Навоий  вилояти Ички ишлар бошқармаси томонидан мана бир неча йилдирки, ёшларни ҳуқуқий маданиятини юксалтириш ҳамда ўсмирлар орасида ҳуқуқбузарлик ва жиноятларни олдини олишга қаратилган учрашувлар, баробарида мустақиллик байрами арафасида вилоят ҳудудидаги эътиборга мухтож болалар ўртасида меҳр-мурувват тадбирларини ўтказишдек хайрли ишлар анъанага айланган.

Ана шундай тадбир Динамо жисмоний тарбия ва спорт жамияти кенгаши Навоий вилояти бўлими, вилоят ИИБ ҳамда Миллий гвардия ходимлари ва Қоровул қўшинларининг 7551-ҳарбий қисмлари билан ҳамкорликда Зарафшон шаҳрида жойлашган меҳрибонлик уйида ташкил этилди. Бу ерда тарбияланаётган болажонлар ҳолидан хабар олиниб, уларнинг яшаш шароитлари ҳамда мавжуд имкониятлари ўрганилди. Меҳмонлар томонидан олиб келинган турли спорт анжомларидан иборат совға-саломлар ўз эгаларига топширилди. Байрам табригини мамнуният билан қабул қилган болалар ўзларининг ижод намуналаридан тақдим этишди.  Масканда тарбияланаётган ўзбек, рус ва қозоқ миллатли болалар шеър ва қўшиқлар айтиб ўз миннатдорчилигини билдирдилар.

• Авваламбор бизни йўқлаб келган меҳмонларга болалар номидан ўз миннатдорчилигимни билдираман. Қувончимни бир сўз билан ифодалай олмайман. Биз учун келтирилган совғалар вақтимизни мазмунли ўтишида катта аҳамиятга эга. Энди болалар учун барча спорт анжомлари етарли бўлди. Меҳрибонлик уйимиздаги опалар худди ўз онамиздек меҳрибон аммо сизларнинг эътиборингиздан бошимиз кўкка етди. Сизларни ишончингизни оқлашга сидқидилдан ҳаракат қиламиз,-дейди меҳрибонлик уйи тарбияланувчиси 15 ёшли Касмаханова Жансулу.

Шундан сўнг масканнинг спорт майдончасида ҳарбий қурол-яроғлардан иборат кўргазма ташкил этилди. Болалар махсус қуролларни қўлларида ушлаб ундан фойдаланиш тўғрисида қизиқарли маълумотларга эга бўлишди. Кўргазма якунида ходимлар томонидан мусиқали ҳарбий трюклар намойиш этилди. Тадбир сўнгида олам-олам таассуротлар билан ҳомийлар томонидан тузалган дастурхон атрофида суҳбат қурилди.

• Бугун ушбу мурғак қалб эгалари билан суҳбатлашар эканмиз, беихтиёр кўзимизга ёш келди. Ҳар бири билимли тарбияли, барчасининг ўзига хос иқтидори бор. Тақдир сабаб уларни меҳрибонлик уйида тарбияланаётганлигидан ачинасан киши. Шукрки, юртимиз истиқлоли туфайли улар учун барча имкониятлар яратилган,  шарт-шароитлар муҳайё.  Насиб қилса, бу ердаги ҳар бир ўғил-қиз ватанимизга муносиб комил фарзанд бўлиб етишади,-дейди вилоят ИИБ Касбий тайёргарлик бўлими катта инспектори, капитан Акрам Хасанов.

 Навоий вилояти ИИБ Ахборот хизмати