Навоий вилояти ИИБ Ҳуқуқбузарликлар профилактикаси бошқармаси ва унинг ҳудудий бўлинмалари профилактика (катта) инспекторлари хизмат фаолиятини янада самарали ташкил этиш, ходимлар ўртасида фаол ишчанлик муҳитини мустаҳкамлаш, ички туризм ривожланишини таъминлаш ҳамда ИИВнинг кўрсатмаси ижросини таъминлаш мақсадида Самарқанд шаҳрига саёҳат ташкиллаштирилди.

Зиёратнинг илк йўналиши қадимий ва навқирон Самарқанд шаҳридаги Ўзбекистон Республикасининг биринчи президенти марҳум Ислом Каримовнинг мақбараси бўлди. Мақбарани зиёрат қилган ёшлар мустақил давлатимиз асосчисининг Ўзбекистон давлатини бунёд этиш борасида амалга оширган ҳамда мажмуада олиб борилган бунёдкорлик ишлари билан яқиндан танишдилар. Шундан сўнг, ходимлар ва уларнинг оила аъзолари Самарқанд шаҳри марказидаги “Мустақиллигимиз асосчиси” дея ўзбек халқи тарихида такрорланмас ва ўчмас из қолдирган марҳум И.А.Каримовнинг ҳайкали ўрнатилган жойга боришди. Юртимиз тинчлик-осойишталиги йўлида куну-тун тинимсиз хизмат қилиб келаётган профилактика инспекторларининг дам олиш кунларини мароқли ўтказиш борасида ташкил этилган саёҳатнинг кейинги манзили бутун дунёга машҳур бўлган Регистон майдони бўлди.

Кейинги манзил-ёшлар онгига асрлар оша сайқалланиб келинаётган миллий анъаналаримизни сингдиришда тимсол бўлган Бибихоним мадрасаси, сўнг, А.Темурнинг қабри қўйилган манзил Гўри Амир мадрасасига ташриф буюришди. Бугунги кунда бу маскандаги ободончилик ишларини кўздан кечиришди, Амир Темур мақбарасида бўлган зиёратчилар обиданинг яратилиш тарихи билан таништирилди. Қадимий ва бетакрор обидаларимиз, улуғ алломаларимизнинг ибратли ҳаёти ва фаолиятини кенг тарғиб қилиш мақсадида ташкил этилган бир кунлик зиёрат ва саёхат табдирлари юқори савияда ва кўтаринки кайфиятда ўтказилди. Бу каби зиёрат тадбир ташкилотчиларига ходимлар ва уларнинг оила аъзолари ўз миннатдорчиликларини билдиришди. Бир сўз билан айтганда, профилактика инспекторлари ва уларнинг оила аъзолари иштирокида ташкил этилган зиёрат соҳа ходимларида унутилмас таассурот қолдирди.

Навоий вилояти ИИБ Ахборот хизмати