Мухтарам юртбошимизнинг "Дунёдаги ҳар қайси давлат, ҳар қайси халқ биринчи навбатда ўзининг интеллектуал салоҳияти, юксак маънавияти билан қудратлидир, бундай енгилмас куч манбаи эса аввало, инсоният тафаккурининг буюк кашфиёти бўлмиш китобдир”-деган пурмано фикрлари асосида бугун республикамизда кўплаб китобхонлик кечалари, маънавий-маърифий тадбирлар бўлиб ўтмоқда. Хусусан, Навоий вилояти ИИБда ҳам ходимларни маънавий дунёқарашини юксалтириш, китоб ўқишга тарғиб қилиш мақсадида “Энг яхши китобхон танлови” эълон қилинган эди. Танловда вилоят миқёсида 15 нафар ходим иштирок этиб, “Бадиий асарлар билимдони”, “Тезкор савол-жавоб” ҳамда “Буюк мутафаккир ва адиб”  шартлари бўйича беллашишди. Ходимларнинг билим савияларини тадбирга таклиф этилган Ўзбекистон Ёзувчилар уюшмаси аъзоси шоир Шоим Шерназар ҳамда вилоят маънавият ва маърифат бўлими бошлиғи ўринбосари И.Турсунов баҳолаб борди. Танлов мобайнида ходимларнинг  ўқиган китоблари ва уларни ҳикоя қилиб бериш санъати синовдан ўтказилди. Муросасиз беллашувда ғолибларни аниқлаш осон кечмади.

3-ўринни ИИБ ҳузуридаги Тергов бошқармаси катта терговчиси капитан Шоҳруҳ Абдусаломов, 2-ўринни Кармана тумани ИИБ ҲПБ хотин-қизлар масалалари бўйича катта инспектори лейтенант Моҳинур Бевутова эгаллаган бўлса, 1-ўринга Навоий шаҳар ИИБ ҲПБ вояга етмаганлар масалалари бўйича инспектор-психологи лейтенант Сурайё Абдуллаева муносиб деб топилди. Ғолибларга ўзбек ва жаҳон адабиётининг энг сара асарларидан ташкил топган  китоблар жамланмаси ҳамда диплом ва пул мукофотлари топширилди.

 Бу танловдан кўзланган ягона мақсад ходимларнинг маънавий дунёсини юксалтириш, билим ва тафаккурини оширишдир.  эндиликда танловда ғолиб бўлган ходим танловнинг республика босқичида иштирок этиши кутилмоқда.

Навоий вилояти ИИБ Ахборот хизмати