Навоий вилояти ИИБда "Муборак Рамазон ойи"да жамоат тартибини сақлашга қаратилган онлайн йиғилиш ўтказилди
Мамлакатимизда фуқароларнинг ҳуқуқ ва манфаатлари ҳимоя қилиниши билан бир қаторда, уларнинг диний эркинлиги кафолатлари ҳам таъминланганлигини юртимизда барча мўмин-мусулмонларнинг меҳр-оқибат, эзгулик ва саховат айёми ҳисобланган “Муборак Рамазон ойи”нинг кенг нишонланишида кўришимиз мумкин. Табаррук ойда халқимизнинг дину диёнати, эътиқоди янада мустаҳкамланади, бир-бирига меҳр ва эътибор кўрсатиш, кўмакка муҳтож, эҳтиёжманд кишиларга беғараз ёрдам бериш, яхшилик, сабру қаноат каби эзгу фазилатлар янада улуғланади.
Халқимиз томонидан файзли ва барокатли кунлар шукроналик ҳисси билан кўтаринки кайфиятда кутиб олинишини, диний идораларда ибодат маросимларининг жамоатчилик иштирокида ўтказилишида аҳоли тинчлиги ва хавфсизлигини таъминлаган ҳолда, жамоат тартибини сақлаш мақсадида, Навоий вилоят ИИБ бошлиғининг ўринбосари Ш.Ибрагимов, вилоят ҳокимининг диний ишлари бўйича ўринбосари Ғ.Мусурманов ҳамда вилоят бош имом-хатиби Т.Рўзиевлар иштирокида онлайн видеоселектор йиғилиши ўтказилди.
Онлайн мулоқот жараёнида вилоятнинг барча шаҳар-туманларидаги ИИБ бошлиқлари ҳамда имом-хатиблар қатнашиб, барча шаҳар-туманларда мавжуд диний идоралар яқинида хавфсизлик тадбирлари кучайтирилиб, автомашиналар тирбандлигининг олди олиниши, масжид кириш ва чиқиш жойларида фуқароларнинг тўпланишига қатъий йўл қўймаслик чораларининг кучайтирилиши, ибодат маросимини тугатиб, қайтишга отланган пиёдалар ЙПХ инспекторлари томонидан йўлнинг белгиланган қисмидан ҳаракатланиши таъминланиши, бир сўз билан айтганда, ҳудудларда жамоат хавфсизлиги назоратининг қатъий кучайтирилиши лозимлиги юзасидан тегишли кўрсатма ва топшириқлар берилди.
Навоий вилояти ИИБ Ахборот хизмати
