Навоийда ИИБ ходимлари хизмат вақтида вафот этган қизилтепалик ходимлар таълим олган мактабда бадиий кеча ташкил этишди
Ватан сўзидан қутлуғ калом бўлмагани каби, она юртга хизмат қилишдек олижаноб амал йўқдир. Эр йигитнинг ватанни ҳимоя қилишдек шарафли иши ор-номуси саналади. Бинобарин, ички ишлар соҳасида ҳам кўксини қалқон қилиб хизмат чоғида вафот этган ходимлар халқ хотирасидан мудом ўчмаган. Хусусан Қизилтепа тумани ИИБ ходимлари марҳум капитан Абдураззоқ Бобомуродов ҳамда сержант Муҳиддин Самиевларнинг хотирасига бағишланган бадиий кеча ташкил этишди. Тумандаги 7-умумтаълим мактабида бўлиб ўтган тадбирда ватан қаҳрамонларининг оила аъзолари туман ҳокимлиги мутсаддилари, маҳалла фаоллари ва шу мактабнинг ўқувчилари иштирок этишди. Хотира кечаси ўқувчилар ижодидан марҳум капитан Абдураззоқ Бобомуродов ҳамда сержант Муҳиддин Самиевларга бағишланган шеър ва қўшиқлар билан янада шукуҳли ўтган бўлса, оила аъзоларига билдирилган ташаккур ва осуда кунларимиз шукронаси йиғилганларни кўнглини бироз юмшатди. Мазкур мактабда таълим олган ватан қаҳрамонлари билан боғлиқ воқелар, уларнинг унитилмас жасорати турмуш ўртоғи, оила аъзолари, синфдош ва хизматдошлари томонидан эслаб хотирланди. Бу каби тадбирларнинг ташкил этилиши ўсиб келаётган ёшларни ватанпарварлик ҳиссида тарбиялашда ижобий самара кўрсатиши шубҳасиз.
