Шеърият – кўнгил кечинмаси, шоир эса  кишилар дардига ошно, туйғулар табиийлиги ва ҳақиқийлигига ишонтира билувчи чинакам илоҳий истеъдод эгаларидир. Жумладан, буюк ўзбек шоири ва мутафаккири Низомиддин Мир Алишер Навоий ҳам асрлар ўтсада, нафақат ўз замонининг, балки ҳамма замон кишиларининг қалбига руҳ бағишлайдиган, эзгуликни куйлайдиган, гўзалликни тараннум этадиган бебаҳо сўз даҳосидир. 

   Дунё адабиёти тарихида тенги топилмас сиймо сифатида улуғланиб келаётган давлат арбоби таваллудининг 580 йиллиги муносабати билан юртимизнинг барча ҳудудларида ўтказилаётган адабий кечалар, мушоиралик базмлари, бадий учрашувлар аждодлар маънавий меросидан фахрланиш ва уларга бўлган ҳурмат ҳиссини янада ошириш каби маънавий муҳитни яратмоқда. Навоий вилояти ИИБ Кадрлар бошқармаси томонидан ташкил этилган маънавий-маърифий тадбирлар улуғ шоир ижодини ходимлар орасида кенг тарғиб қилиш ва янада чуқурроқ ўрганишга туртки бўлмоқда. Бошқарма бошлиғининг жорий йил 20 январдаги буйруғига мувофиқ, бошқарма таркибий тузилмалари ва ҳудудий бўлинмаларида хизмат қилаётган ходимлар ва уларнинг оила аъзолари ўртасида “Навоий ғазаллари шайдосиман” кўрик-танловининг ўтказилиши сўз мулкининг султонига бўлган ҳурмат ва эҳтиромнинг ёрқин намунаси бўлди. Мазкур тадбирда бошқарма соҳавий хизматлари, Жазони ижро этиш муассасалари, таркибий тузилмалар ҳамда ҳудудий бўлинмалар ходимлари қатнашди.

  Низом талабларига асосан, ҳар бир қатнашчи оила аъзолари иштирокида Навоий қаламига мансуб ғазал ва рубоийларни ифодали, ёддан баён қилиши, видеоролик тарзида тадбир ташкилотчиларига етказиши белгиланган эди. Ўтказилган тадбир доирасида 100 дан ортиқ видеороликлар тақдим этилди. Танлов шартларини баҳолаш мезонлари асосида юқори савияда ташкил этиб, ўз чиқишлари орқали замон ва келажак ҳамоҳанглигини узвий боғлаган ҳамда ғазалларни аруз вазнига мувофиқ бадиий маҳорат билан ижро этган вилоят бошқармаси ҳузуридаги тергов фаолиятини ташкиллаштириш бўлими терговчиси, катта лейтенант Шоҳруҳ Абдусаломов фахрли 1 ўринни, 4-сон ЖИЕК тарбиявий ишлар бўлим бошлиғи, катта лейтенант Обиджон Эсонов 2 ўринни ҳамда Ахборот хизмати бошлиғи, катта лейтенант Ўктам Усмонов 3 ўринни қўлга киритди. Ғолиблар диплом ҳамда қимматбаҳо эсдалик совғалари билан тақдирландилар.

      Навоий вилояти ИИБ Ахборот хизмати