Навоий вилояти ИИБ Маънавий-маърифий ишлар ва кадрлар билан таъминлаш хизмати мутасаддилари томонидан ИИВ Навоий академик лицейида тарғибот учрашуви ташкил этилди
Умумий ўрта ва ўрта махсус таълимни тамомлаш арафасида турган ёш ўғил-қизлар ичида ҳуқуқни муҳофаза қилиш органлари ходими бўлишни мақсад қилганлар кам эмас. Аммо, кўпчилик қайси олий таълим муассасасида ўқиш лозимлиги ва бунинг учун қандай фанлар бўйича синов имтиҳонлари топширишни билмайди. Шу мақсадда Навоий вилояти ИИБ Маънавий-маърифий ишлар ва кадрлар билан таъминлаш хизмати бошлиғи ўринбосари ва бошқа мутасаддилар ўқувчи-ёшлар билан тарғибот учрашувлари ташкил этишмоқда.
ИИВ Навоий академик лицейининг 2-босқич ўқувчилари билан ўтказилган навбатдаги тарғибот тадбири давомида Ўзбекистон Республикаси ИИВ Академияси, Жамоат хавфсизлиги университети, Ҳуқуқни муҳофаза қилиш академиясига ҳужжат топшириш тартиби, қабул жараёни, ўтказиладиган танловлар тўғрисида батафсил маълумот берилди. Шунингдек, академияда курсантларнинг таълим олишлари, спорт билан шуғулланишлари учун яратилган шарт-шароитлар, имкониятлар санаб ўтилди. Тадбир давомида ички ишлар органларида амалга оширилаётган ислоҳотлар, ходимларни ижтимоий ҳимоясини таъминлаш бўйича кўрилаётган чора-тадбирлар ҳамда ИИВ академияси тарихи ва бугуни акс этган видеоролик намойиш этилди.
Лицей ўқувчилари томонидан берилган саволларга мутахассислар томонидан батафсил жавоб берилди.
Навоий вилояти ИИБ Ахборот хизмати
